来源：经典台词网(WWW.73333.CN)发布时间：2014-10-15热度：次
时间： 八十年代末，某天早上；
地点： 老佛山城区，某户普通家庭；
人物： 老豆——50多岁，老佛山城区（今祖庙街道）居民；
阿莲——20多岁，老豆的媳妇；
阿诚——30岁左右，老豆的儿子；
阿达——30岁左右，阿诚的表哥，居住香港。
[幕启，音乐起。
[老豆开心地拿相薄上，放在台面，又整理一下花瓶，接着四处张望，继而向房内喊。
老豆 阿莲啊，间房你执好未啊。
[阿莲拿着老豆专用的茶杯上
阿莲 阿爸啊，执好晒啦，连地都拖埋啦。你忙咗成朝，休息下先啦，饮啖参茶先（递茶）。
老豆 都係你哋喺国营单位做好，有啲咁好嘅福利，带挈老豆饮参茶。（喝了一口）唔得，我去睇下啲汤得未先得。
阿莲 阿爸啊，今日系香港的表哥嚟之嘛，使唔使咁紧张啊？
老豆 乜唔紧张啊。呢个阿达上次番嚟嗰阵，你都仲未嫁入门，我同阿诚仲住响旧屋庶咧，所以你唔知咁多咖啦。呢个表哥出世嗰阵，佢阿爸阿妈都喺香港“搏杀”紧，唔得闲凑佢，所以就带咗佢嚟佛山俾我哋照顾，所以佢同我哋阿诚自细就一齐玩咖嘞，到五岁先番香港。阿达又真係几有我心咖噃，佢隔几年（无耐）就番嚟探我一次，次次嚟都带好多香港嘅好嘢俾我哋咖，又有衫又有嘢食。人哋对我哋咁好，我哋点可以咁求其。
阿莲 系嘅，唔可以求其，等我抹埋张台先啦。
老豆 系嘞，今日你留喺屋企执屋，阿诚又去接阿达，同单位请咗假未咖？
阿莲 （随口地）几时开工我哋话事嘅啫。
老豆 乜嘢话？
阿莲 （自知失语，忙解释）我系话……我哋同单位领导关系都几好，请一日半日假冇乜问题嘅。
老豆 咁又係啊，你哋都评上“先进工作者”，肯定乜都易话围啦。啲街坊知道，我个仔同新抱喺公司度係“双职工”，待遇好，都唔知几羡慕啊。还过楼上阿林姨都唔知系唔系妒忌我，佢竟然话见到你同阿诚帮人做车衫啊……
阿莲 吓？（吓得把桌上的花瓶打番）
老豆 做乜咁“论尽”啊？
阿莲 阿爸啊，车衫未车衫啰，有乜所谓唧。
老豆 乜冇所谓啊，你哋明明系堂堂国营单位嘅正式职工嚟咖嘛，竟然俾佢话到你哋系啲街边地痞?！
阿莲 个体户都系正经揾钱啫，冇乜唔见得人格。行行出状元吖嘛。
老豆 人哋话紧你噃，你仲帮住外人嚟教训我？
阿莲 唔系唔系。啊，我去睇下啲汤先。
老豆 啊，系，捞一捞啊，得就落啲盐喇。
[阿诚拉着皮箱进，阿达随其后上。
阿诚 老豆，表哥嚟咗啦。
老豆 阿达！
阿达 舅父！冇见咁耐，仲系咁有福相噃。
老豆 冇见咁耐，仲系咁识卖口乖！阿达啊，你都辛苦咖啦，快啲坐低先。
阿达 哇，条祖庙路靓左甘多，差啲认唔到，好在有阿诚带路。
老豆 系啊，家下佛山变化好大了，阿莲，斟杯茶俾表哥啦。
[阿莲捧着茶壶出
老豆 嗱，阿诚个老婆，我嘅新抱——阿莲。
阿莲 饮茶，表哥。
阿达 thank you，人就第一次见，相就见得多了，阿诚真系本事，娶到个好老婆。
老豆 有乜咁本事吖，好在佢哋两个係国有企业嘅 “双职工”，都算有啲保障啦。
阿达 乜嘢叫“双职工”啊？
老豆 佢两个喺同一个单位度做，一齐享受单位嘅福利，咧，呢间屋都系佢哋单位分嘅嗟嘛，佢哋仲係单位嘅“先进工作者”啊，（指着墙上两个奖状）嗱，呢两张係佢哋嘅奖状，一人一张。啲街坊都几羡慕佢哋咖！
阿达 舅父，你呢间屋系香港算豪宅啦，你家下真系安落晒咯。
老豆 （笑到见牙吾见眼）算系啦。
[此时，阿诚忙上前同老豆斟茶
阿诚 老豆，你口干了，饮啖茶先，（压低声音）老豆啊，呢啲嘢唔好成日攞出嚟讲喇。
老豆 做乜唧，好失礼咩，难得阿达嚟一次我哋屋企，梗系要讲多啲喇。
阿达 係呢，佢哋两个喺公司度係做乜嘢咖？
老豆 （顺口地）行行企企，做下经理之嘛。
阿达 哇，咁真係好本事噃！
老豆 算得乜吖，饮茶！
阿莲 （将阿诚拉到一边悄声地）你老豆越作越大啦！
阿诚 你就由佢威下啦。
老豆 係嘞，你一场嚟到，少少意思，不成敬意。（拿出一个塑料袋，递到阿达跟前）嗱，有你最钟意嘅盲公饼同西樵大饼。攞番香港俾啲街坊朋友试下。
阿达 哇，最钟意食饼咖嘞，多谢晒噃。礼尚往来，我都有啲嘢俾舅父你咖。（从行李中拿出一些杯面）呢啲“公仔面”，呢度冇得买咖。（又拿出几件“太空褛”）呢啲太空褛，係我哋厂啲货版嚟咖，都几好着咖。（还拿出几件衣服）仲有呢啲，係我哋间厂啲货版嚟咖，唔知阿诚同阿莲钟唔钟意。
老豆 哎呀，过嚟坐下，食餐饭未算啰，使乜咁客气啊？阿达阿莲，过嚟睇下啲衫啱唔啱着！
阿莲 （喜滋滋地上前去接过衣服）哇，啲布料又真係唔同啲咖噃。（情不自禁地在身上试了试衣服）
阿达 阿莲，你呢件係呢绒布做咖。
阿莲 呢绒？边度入货咖？贵唔贵咖？有冇销大陆咖？
老豆 阿莲，做乜一轮嘴问咁多嘢啊？
阿诚 冇，佢都係八卦啫，冇乜特别意思咖。
阿莲 （口直心快）唔係啊，我想问下有冇得係度攞料……
阿诚 料……料……了解下就算啦，唔好阻住表哥同老豆倾谒啦！（打眼色）讲嘢要有分寸咖嘛。
阿达 唔紧要，都係问一句啫。呢啲布喺香港攞货会易啲，我都唔知大陆有冇门路攞到咖。
阿莲 （开心地自言自语）如果攞到呢只布嚟做衫，唔忧冇得做啊！
老豆 （敏感地）乜话？
[阿达捏了阿莲一下，阿莲惨叫一声。
老豆 做乜啊？
阿诚 冇，佢俾蚁咬亲。莲，见痛就番入房啦！
阿莲 咩唧？我想係度同表哥倾多两句啊，你呷醋啊？
老豆 阿莲，你头先讲乜嘢唔忧冇得做话？
阿诚 佢讲紧表哥啲生意啊。（急忙转移话题）啊，呢件恤衫係唔係俾老豆咖？
阿达 係，都係我哋厂出咖，我谂一定啱舅父嘅。舅父你试下？
老豆 好，好！（把衣服往身上一穿，用力过猛，破了个大口子）
阿达 哎呀，唔好意思，攞嚟嗰阵仲好地地咖，我都唔知会咁。
阿莲 （看了看另外几件衣服）呢几件衫，布料就够晒时麾啦，不过啲车工好似嘛嘛噃。
阿诚 送嘢俾你仲咁多声气。
阿莲 （有点尴尬）唔好意思啊表哥，我份人好直咖，有嗰句就讲嗰句咖啦。
阿诚 你仲讲？
老豆 （打破尴尬局面）阿达啊，我俾啲相你睇吖，係佢两个啰“先进工作者”嗰阵影咖。
阿达 咁威啊？咁就真係要睇睇啦。
[老豆和阿达坐下来看照片。
[阿莲把阿诚拉到一边。
阿莲 老公，快啲行动啦。
阿达 行咩动啊？
阿莲 你见唔见到表哥带嚟呢度啲料几靓啊？我想问佢要货啊，咁靓嘅料，加埋我哋咁好嘅手工，有乜理由唔好卖吖。
阿达 但係老豆就喺度，唔方便讲说话咖。
阿莲 苏州过后冇艇搭咖啦，一係咁啦，一于调虎离山，你扯开阿爸去一边，我同表哥讲。
阿达 得唔得咖？
阿莲 唔得都要得。（对老豆）阿爸啊，你唔係有张佛山地图嘅？不如你俾阿诚，等佢睇下带表哥去边度玩好？
老豆 喺房间个书架度吖嘛，自己揾啦。
阿莲 佢个大头虾，自己边揾到吖，阿爸，你帮下阿诚啦。（捅了一下阿诚肘）
阿诚 係啊，冇你我边揾到吖。
老豆 真係冇用咖。阿达，你坐下先啦。
[老豆和阿诚入房。
阿莲 （急走到表哥身边）表哥啊，，你可唔可以下次帮我带多啲靓布料番嚟啊，越多越好。
阿达 可能一次过唔方便带太多咖噃。
阿莲 表哥，老实讲啊，你啲货版手工都咁差，出嚟啲衫又点会好吖。不如咁，你帮我带多几件好料番嚟，我免费帮你车货版？
阿达 你识咩？
阿莲 我依家着紧呢件都係我自己车咖！
阿达 又睇唔出你咁本事噃。
阿莲 咁你信唔信得过我，俾我帮你车货版吖？只要你俾多啲布料我，够我做多五六件，我免费帮你车。
阿达 你要车咁多？自己都着唔晒啦。
阿莲 唔係着，攞嚟卖啊。
阿达 卖？你唔係喺国企度做乜嘢“双职工”咖咩？
阿莲 （望了望房内）个阿诚就叫我瞒住阿爸，惊佢唔开心嘅。但我知表哥你好开通嘅，而且我真係想你帮我，我话过俾你知，不过你唔可以话俾阿爸知咖。
阿达 好，你讲吖。
阿莲 其实，我同阿达辞咗厂度份工成年咖啦，之后开咗间制衣铺。虽然之前生意都唔係咁好做，不过依家熟客多咗，我哋都赚得同以前喺厂度差唔多啦。依家就係揾唔到好嘅布料，如果入到你呢啲咁好嘅货，包保客似云来啊。
阿达 真嘅？
[幕后传来老豆愤怒的声音：“人哋瞒我咁耐！”
[老豆气冲冲地上，阿诚跟在他身后，想解释又不行。
阿莲 （有点害怕）阿爸，你做乜啊？
老豆 你哋竟然瞒住我，辞咗职去做地痞个体户？
阿莲 你听到晒？
老豆 你梗系想我听唔到啦。
阿诚 阿莲啊，唔好以为我哋间屋好大先得咖，仲讲到越嚟越大声，我兜都冇得兜啊。
老豆 咁大件事都瞒住我，我乜嘢架都俾你哋丢清光啦！
阿达 舅父啊，行行出状元，出嚟做生意都冇乜咁丢架啫。
老豆 你唔好出声，你係资本主义嘅。（你地同我地唔同）
阿达 乜野唔同啊？都系有口有眼有鼻。
老豆 我地系贫苦大众，你地系资本家！
阿达 （大笑），哎呀，舅父，乜你甘可爱架，宜家仲讲呢啲野，甘你又会接待我呢个资本家既？哈哈！
[老豆语塞
阿莲 老豆啊，你听我讲啦！
老豆 我唔听，你哋变晒质啦，仲做乜嘢“先进工作者”啊？（扯下两张奖状，欲撕）你哋冇资格攞奖状！（欲撕）
阿达 （从老豆手中抢过奖状）佢哋落足心机做嘢，先得到呢两张奖状，撕咗佢，太可惜啦。
老豆 我想佢哋安安份份做嘢，点知佢哋……令我太失望啦。
阿达 舅父啊，你都係想佢哋可以过啲安稳嘅生活啫，开铺头车衫都係一条出路（可以好好甘生活）嚟咖。舅父啊，唔好睇小个铺头仔啊，香港好多老字号，都係由铺头仔做起咖咋，依家都变成上市公司，跨国集团啦。阿诚同阿莲，都算係够胆饮“头啖汤”嘅人啦，眼光好，又肯挨，第日啊，舅父你就係大老总个老豆啦。
老豆 讲就易！
阿达 有版你睇咖啦，我间厂都係由铺头仔做起，依家，都有一定规模啦。
老豆 你间厂都係铺头仔做起？你老豆又话你一做就好架势嘅？
阿达 我老豆同你一样咁要面，他初初又米同人打工，所以先会同你咁讲咖啫，不过，我相信，只要肯挨，一定会出头嘅！
阿莲 阿爸啊，其实你头先饮嗰啲参茶，都係我哋赚到钱买俾你补身咖，俾我哋做落去，一定有起色咖。
老豆 （口气软下来）你哋都做到呢一步咯，咁我仲有乜好讲吖。不过讲明啊，如果有一日做唔掂，我又要你哋重新揾工做咖。
阿诚 放心啦老豆，我哋一定好俾心机，唔会令你失望嘅。
阿莲 表哥啊，咁我哋个合作计划……
阿达 我唔同意。
阿莲 （失望地）哈？转自：http://www.73333.cn/
阿达 我有另外一个谂法。宜家香港发展得都好快，好似我地呢啲制衣厂都遍地开花，依家劳动力短缺，好多熟手技工都俾人挖走，所以我啲货先至会质量差成咖啫。所以我希望，可以向内地发展。我内地嘅厂房需要技术总监，唔知你两个有冇兴趣？
阿诚 （高兴地）你请我哋？
阿莲 技术总监？
老豆 咁佢哋未即係（又系双职工）可以喺外企度做双职工？好啊好啊，我赞成！
阿达 系外企的双职工啊，舅父！
阿达 咁就好啰，依家交通越嚟越方便，以后呢度一定好似香港咁有地铁，我哋喺度设厂，销去边度都方便啦。
阿莲 好啰，阿爸接受咗我哋做生意，以后唔使扮穷啦！我啲手饰可以拎出嚟戴啰！（从口袋里掏出金戒指戴在手上，不断欣赏）
老豆 （愣了）乜真係咁好赚咖？
阿诚 我哋赚到，老豆你都有份咖！阿莲！
阿莲 啊，係！（拿出一金表，戴在老豆手上）哇，戴喺老豆手上面，真係衬到绝啊！
老豆 变啦，变啦！
阿诚 （以为老豆不高兴）老豆，你做乜嘢啊？
老豆 我哋嘅生活越变越好啦！阿达，今晚我哋去华侨大厦食餐劲嘅，佢两只嘢请！
阿诚 （开心地）好！
阿莲 咪系道傻笑了，仲唔快啲将我送比你嘅嗰件“右丹奴”西装攞出嚟着啦，哈哈，我哋嗰部CALL机终于可以见得光啦。
阿达 呵呵呵，舅父，你有福啦！
[落幕。
